काठमाडौं- नेपाल स्टक एक्सचेञ्ज (नेप्से) परिसूचक ५४.५१ अंक बढेर २ हजार ९ सय ३१.५५ विन्दुमा कायम भएको छ । आइतबार नेप्से परिसूचकसँगै कारोबार रकम पनि बढेको छ । गत बिहीबार ६४ अंकले बढेर २१ अर्ब २२ करोडको कारोबार भएको सेयर बजारमा आइतबार २३ अर्ब ५९ करोड ७७ लाख १२ हजार १८२ बराबरको किनबेच भयो ।
आइतबार १८३ कम्पनीको मूल्य बढ्दा ७३ कम्पनीको घट्यो भने ८ कम्पनीको स्थिर रह्यो । आइतबार धेरै कारोबार भएका कम्पनीमा कुमारी बैंक, नेसनल हाइड्रोपावर, शिवम् सिमेन्ट, ङादी ग्रुप र हिमाल दोलखा हाइड्रोपावर अगाडि रहेका छन् । व्यापार बाहेक सबै समूहका सूचक बढेका छन् ।
व्यापार समूह ०.११ प्रतिशत घट्यो । माइक्रोफाइनान्स समूह सबैभन्दा धेरै ४.२१ प्रतिशत बढ्यो । यस्तै, बैंकिङ २.४९, विकास बैंक २.४६, फाइनान्स २.१३, होटल तथा पर्यटन ३.०५, हाइड्रोपावर ०.३३, लगानी ०.७७, जीवन बीमा २.००, उत्पादन तथा प्रशोधन १.९३, निर्जीवन बीमा २.७२ तथा अन्य समूह १.७१ प्रतिशत बढे ।
१० कम्पनीको मूल्य १० प्रतिशत बढ्यो । १० प्रतिशत बढेका कम्पनीमा रिलायन्स स्पिनिङ मिल्स, कर्पोरेट डेभलपमेन्ट बैंक, साल्पा विकास बैंक, अभियान लघुवित्त, सोलु हाइड्रोपावर, भुजुङ हाइड्रोपावर, होटल फरेस्ट इन र विजय लघुवित्त छन् । सुपर मादी हाइड्रोपावरको मूल्य सबैभन्दा धेरै ३.१५ प्रतिशत घट्यो ।
By
